БДИ һәм югары уку йортлары өчен яңа кагыйдәләр: Россиядә нинди үзгәрешләр әзерлиләр
Укучыларны, абитуриентларны һәм студентларны мәгариф системасында яңа үзгәрешләр көтә. Планлаштырылган яңалыклар турында профильле ведомстволар вәкилләре хәбәр итте.
Җәмгыять белеме буенча БДИ эчтәлеге үзгәрәчәк
Җәмгыять белеме буенча бердәм дәүләт имтиханы эчтәлеген ике елдан үзгәртү планлаштырыла. Киләсе уку елында имтихан үзгәрешсез калачак. Бу хакта ПМЮФ сессиясендә Россия мәгариф министры Сергей Кравцов хәбәр итте.
Ул төзәтмәләр гамәлдәге белем бирү программалары белән бәйле, дип ачыклык кертте.
"Ике елдан җәмгыять белеме буенча бердәм дәүләт имтиханында үзгәрешләр булачак. Сез беләсез, без тугызынчы сыйныфта тарих буенча телдән имтихан кертәбез, һәм, димәк, хәзер, киләсе уку елында, җәмгыять белеме фәнендә бернинди үзгәрешләр дә булмаячак, чөнки балалар гамәлдәге программа буенча укыйлар. Әмма ике елдан БДИ эчтәлеге үзгәрәчәк", - диде Кравцов.
Юридик вузларда бюджеттан тыш урыннар кыскартылачак
Россиядә югары уку йортларында юридик юнәлешләрдә бюджеттан тыш урыннарны кыскарту турында фикер алышалар. Бу хакта ПМЮФ-2026 кысаларында Россия юристлары ассоциациясе рәисе Сергей Степашин хәбәр итте.
Аның сүзләренчә, кайбер уку йортларында әзерлек сыйфаты базар таләпләренә туры килми.
"Хәзер бюджеттан тыш урыннар санын киметү бурычы куелды. Бу канун, аны үтәргә кирәк", - дип белдерде ул.
Шулай ук Степашин юридик югары уку йортлары санын яңадан карау һәм белем бирү программаларының сыйфатын яхшырту кирәклеген билгеләп үтте.
"Минем мәгълүмат буенча, алар күп, 400 дән артык. Союзда 55 иде. Ә халык ике тапкырга күбрәк", - дип билгеләде Степашин.
Гарәп телен мәктәпләрдә өйрәнә башлаячаклар
Россия мәктәпләрендә гарәп телен өйрәнүнең яңа программасы яңа уку елының 1 сентябреннән эшли башлаячак, дип хәбәр итте РФ Мәгариф министрлыгы башлыгы Сергей Кравцов.
«Өч ел бездә Гарәп теле буенча олимпиада уздырыла, Россия мәктәпләрендә гарәп телен өйрәнү программасы расланды, ул яңа уку елының 1 сентябреннән эшли башлаячак», – дип билгеләп үтте Кравцов, аның сүзләре ведомство хәбәрендә китерелә.
Шул ук вакытта Рособрнадзорда гарәп теленнән бердәм дәүләт имтиханын 2033 елдан да иртәрәк кертү мөмкин түгел дип хәбәр иттеләр. Моңа кадәр укыту-методика базасын эшләү һәм имтихан материалларын сынап карау планлаштырыла.
"Гарәп теленнән урта гомуми белем бирү программалары буенча БДИ сынауларын 2032 елдан да иртәрәк үткәрү мөмкин түгел. Шул рәвешле, ДЙА-11 кысаларында Гарәп теле буенча БДИ 2033 елдан да иртәрәк кертелмәскә мөмкин», – диелә ведомство хәбәрендә.
Югары мәктәп өчен «Чит (гарәп) теле» предметы буенча укыту-методик тәэмин итүне эшләү сроклары 2030 елга кадәр билгеләнгән.
Элегрәк РФ Хөкүмәте 2029/2030 уку елына кадәр югары белем бирүнең яңа моделенә күчү кагыйдәләрен раслады. «Болон системасын» өч дәрәҗәле модельгә алыштырылыр дип көтелә: база, махсуслаштырылган (магистратура) һәм һөнәри (аспирантура) белем.