Укучыларны йомгаклау аттестациясен Россия Мәгариф министрлыгы һәм Рособрнадзор каршындагы иҗтимагый советларның экспертлары тикшерде
Мәгариф һәм фән өлкәсендә күзәтчелек буенча федераль хезмәт җитәкчесе урынбасары Игорь Круглинский 2020 елда ДЙА уздыру тәҗрибәсе турында сөйләде.
"Узган ел БДИ уздыруның бөтен инфраструктурасын, расписаниесен үзгәртеп корырга, эпидемиологик вәзгыять нигезендә билгеле бер кагыйдәләрне үзгәртергә туры килде. Әлеге тәҗрибәдән чыгып, быел вузга керергә планлаштырмаган 11 нче сыйныф укучылары аттестат алу өчен дәүләт имтиханы (ГВЭ) формасында ике мәҗбүри предмет тапшырачаклар - рус теле һәм математика. 11 нче сыйныф укучылары, аттестат алу өчен, БДИ формасында бер мәҗбүри уку предметын - рус телен тапшыралар», - диде ул.
База дәрәҗәсендәге математика буенча БДИ 2021 елда үткәрелми. Профильле дәрәҗәдәге математика һәм башка уку предметлары буенча БДИны чыгарылыш сыйныф укучылары югары уку йортларына кабул иткәндә БДИ нәтиҗәләрен бирү өчен кирәк булганда тапшыралар.
9 нчы сыйныф укучылары ике предметны (рус теле һәм математика) тапшыралар һәм чыгарылыш сыйныф укучылары мөһим дип бәяләгән мәсьәлә буенча йомгаклау контроль эшен язалар. Регионнар карары буенча контроль эш мәктәп укытучылары, яки бәйсез комиссияләр тарафыннан тикшерелә.
К.Г. Разумовский исемендәге Мәскәү дәүләт технология һәм идарә университеты президенты Валентина Иванова быел БДИ тапшыру кагыйдәләренең саклануына игътибарны юнәлтте. Ул ике ел нәтиҗәләрен җентекләп карарга һәм белемнәрнең йомгаклау үлчәмнәрен үткәрергә тәкъдим итте.
Россия Мәгариф һәм фән министрлыгы каршындагы Иҗтимагый совет әгъзасы Александр Привалов үз докладында мәктәпләрдә документлар әйләнеше темасына һәм бердәм дәүләт имтиханының актуальлеге мәсьәләләренә кагылды. Ул ассызыклаганча, педагогларның төп вакыты үз укучыларын укытуга юнәлтелергә тиеш, шул ук вакытта "мәктәп балаларны имтиханнар өчен түгел, ә аларны озын һәм катлаулы тормышка әзерләргә тиеш".
Иҗтимагый совет әгъзалары шулай ук белем бирү эшчәнлеген лицензияләү турында да фикер алыштылар. Россия мәгариф күзәтчелеге башлыгы урынбасары Светлана Кочетова 2021 елның 1 гыйнварыннан үз көченә кергән белем бирү эшчәнлеген лицензияләү турындагы нигезләмәгә кертелгән үзгәрешләр турында сөйләде. Ул хәбәр иткәнчә, хәзер Рособрнадзор профильле министрлыклар белән берлектә яңа лицензияләү һәм белем бирү эшчәнлеген аккредитацияләү моделе өстендә эш алып бара, аның алымнары төрле мәйданчыкларда тикшерелә.
Россия Мәгариф һәм фән министрлыгы каршындагы Иҗтимагый совет рәисе Виталий Сурвилло йомгаклау аттестациясе турында фикер алышты.
Катнашучылар иҗтимагый советларның уртак утырышларын үткәрү практикасын уңай бәяләделәр һәм алга таба да дәвам итү яклы булдылар.
Белешмә өчен:
Россия Мәгариф министрлыгы каршындагы Иҗтимагый совет ведомствоның иҗтимагый берләшмәләр һәм коммерциягә карамаган башка оешмалар белән үзара хезмәттәшлеген тәэмин итү, Министрлык эшчәнлегенең хәбәрдарлыгын һәм ачыклыгын арттыру максатында оештырылган.
Иҗтимагый совет составы Россия Мәгариф министрлыгы сайтында урнаштырылган.