Мәгариф министрлыгы башлыгы Сергей Кравцов "Россия 24" телеканалы эфирында 2021 елда БДИ уздыру турында сөйләде
«Бүген эпидемиологик вәзгыять безгә имтихан уздыруны июньдә оештырырга мөмкинлек бирә. Узган ел БДИ уздыру тәҗрибәсен исәпкә алып, төбәкләрдә әзерлек эшләре бара. Имтиханны максималь уңайлы шартларда һәм укучыларның һәм оештыручыларның сәламәтлегенә зыян китермичә уздыру өчен барлык саклану чаралары гамәлгә ашырылачак ", - дип мәгълүмат бирде Россия Мәгариф министрлыгы башлыгы.
Сергей Кравцов ачыклык керткәнчә, югары уку йортларына укырга керергә җыенмаган унберенче сыйныф укучылары өчен имтиханнар мәктәптә оештырылачак: балалар рус теле һәм математика тапшырачак.
"Чыгарылыш кичәләре дә традицион режимда узачак дип өметләнәбез, әмма актуаль эпидемиологик вәзгыятькә караячакбыз. Беренче урында безнең өчен - сәламәтлек ", - дип шәрехләде Сергей Кравцов.
Ул хәбәр иткәнчә, бүген барлык Россия мәктәпләре диярлек көндезге режимда эшли һәм, пандемиягә карамастан, укытуның уңай динамикасы билгеләп үтелә. Бу хакта төрле тикшеренүләр, шул исәптән халыкара тикшеренүләр нәтиҗәләре күрсәтә.
Мәгариф министры искә төшергәнчә, регионнарда эшне һәрьяклап контрольдә тоту алып барыла: мониторинг төрле категориядәге укучылар белән эшләүгә, педагоглар эшчәнлегенә, укудан тыш эшчәнлекне оештыруга, мәктәпләр һәм балалар бакчалары төзүгә бәйле 50гә якын күрсәткечне үз эченә ала.
"Бу мониторинг нәтиҗәләре төбәкләргә үзләренең көчле һәм йомшак якларын күрергә һәм һәр укучы кайда яшәвенә карамастан, сыйфатлы белем алырга мөмкин булсын өчен тиешле эш оештырырга мөмкинлек бирә", - дип ассызыклады Сергей Кравцов.