Светлана Николаевна Захарова “Татар-информ” матбугат конференциясендә катнашты.
Татарстанда быел беренче сыйныфка 57 меңнән артык бала кабул итәргә планлаштыралар. Бүгенгә дәүләт хезмәтләре порталы аша мәктәпкә кабул итүгә 42 мең гариза бирелгән, калганнары - мәгариф оешмаларында шәхси кабул иткәндә, дип хәбәр итте мәгариф өлкәсендә күзәтчелек һәм контроль департаменты җитәкчесе урынбасары Светлана Захарова.
"Барлык гаризалар да эшкәртелде. Әмма, шуңа да карамастан, Мәгариф һәм фән министрлыгына 1 гыйнвардан башлап бүгенге көнгә кадәр беренче сыйныфка керү буенча 500дән артык мөрәҗәгать керде. Мөрәҗәгатьләрнең төп өлеше, марттан июньгә кадәр, кабул итү буенча аңлатмалар сорап килде. Икенче дулкында, 6 июльдән, 130 га якын гариза килде, алар буш урыннар булмау белән бәйле ", - диде спикер.
Иң күп гаризалар Питрәч районыннан - 125, Әлмәт районыннан - 21 һәм Лаеш районыннан - 10 мөрәҗәгать керде.
Аерым алганда, Питрәч районыннан мәктәпкә кабул итмәү турында 323 гариза килде, шул исәптән 176 - беренче сыйныфка һәм 147 - 2-9 сыйныфларга. "Кичә бу балаларны кабул итү турында боерык чыгарылды. Ата-аналарга шалтыратып, кабул итү турында хәбәрнамә юлланды», - дип ассызыклады Светлана Николаевна.
Әлмәттән шикаятьләр инженерлык лицеена кабул итүгә кагылды. Барлык теләүчеләрне кабул итү өчен әлеге оешмада тагын ике сыйныф ачылды, өстәмә 72 урын булдырылды. Шулай итеп, лицейда 1411 баланы кабул итү планлаштырыла, бу мәктәпнең проект куәтеннән 1,5 тапкырга диярлек күбрәк.
Тулырак мәгълүмат «Татар-информ» материалларында: https://www.tatar-inform.ru/news/dve-zony-vyzyvayut-trevogu-kak-v-tatarstane-resayut-vopros-s-mestami-v-detsadax-i-skolax-13597