«Бергә тапшырабыз! Ата-аналарның БДИ тапшыру көне» Бөтенроссия акциясе
Дәүләт йомгаклау аттестациясендә чыгарылыш сыйныф укучыларының имтиханнарга психологик әзерлеге зур роль уйный.
Рособрнадзор тарафыннан уздырылучы һәм 2023 елда җиденче тапкыр уза торган «Бергә тапшырабыз! Ата-аналарның БДИ тапшыру көне» Бөтенроссия акциясе күпләр өчен традицион акциягә әверелде.
13 мартта Татарстан Республикасы Зеленодольск шәһәрендә узган акциядә ата-аналардан тыш мәгариф министры И.Г.Һадиуллин, Татарстан Республикасы Яшел Үзән муниципаль районы башлыгы М.П.Афанасьев, мәгариф белән идарә итүнең региональ һәм муниципаль органнары, Татарстан Республикасы Спорт министрлыгы һәм Татарстан Республикасы хезмәт, халыкны эш белән тәэмин итү һәм социаль яклау министрлыгы җитәкчеләре, Казан дәүләт энергетика университеты ректоры Э.Ю.Абдуллаҗанов, Татарстан Республикасы Дәүләт Советы депутатлары, республиканың иҗади һөнәр ияләре һәм сәнәгать предприятиеләре вәкилләре, УНИКС баскетбол клубы, «Зенит-Казан» волейбол клубы, «Рубин» футбол клубы спортчылары, массакүләм мәгълүмат чаралары вәкилләре катнашты.
Акциядә катнашучылар рус теле буенча БДИның кыскартылган вариантын үтәүдә үз көчләрен сынап карадылар. Бу вариант төрле типтагы имтихан биремнәре турында күзаллау бирә. Имтиханда катнашучылар БДИның барлык процедурасын: имтиханга теркәлүдән алып үз нәтиҗәләрен алганчы узу мөмкинлеген алдылар. Акциядә катнашучыларга БДИ катнашучыларының биремнәр ничек эшләнүе һәм имтихан эшләре тикшерелүе, җәмәгать күзәтүчеләре эше һәм видеокүзәтү системасы ничек оештырылуы, имтихан вакытында нәрсә эшләргә ярамавы турында сөйләделәр. Нәтиҗәләр буенча матбугат конференциясе узды, анда мәктәп, ППЭ җитәкчеләре, педагоглар акциядә катнашучыларны кызыксындырган сорауларга җавап бирделәр.
Имтиханда билгеләнгән тәртипне үтәүне Татарстан Республикасының федераль иҗтимагый күзәтүчеләре корпусы вәкилләре башкарды.
Илсур Гәрәй улы билгеләп үткәнчә, быел республикада тугызынчы сыйныф укучыларын да, унберенче сыйныф укучыларын да дәүләт аттестациясенә әзерләү буенча мәгълүмати кампания шактый киңәйтелде.
2022 елның декабрендә «Барысын да белемнәр генә хәл итә: белгеч белән тикшерербез!» дигән региональ акция узды, анда чыгарылыш сыйныф укучылары математика буенча контроль-үлчәү материалларын чишүдә үз көчләрен сынап карадылар һәм педагоглар белән бергә алынган нәтиҗәләрне анализладылар. Акциядә 19744 тугызынчы сыйныф укучысы һәм 8485 унберенче сыйныф укучысы катнашты.
2023 елның февралендә «Җиңүчеләр кануны: 100 баллык казаныш серләре!» акциясе уңышлы тәмамланды.