Чыгарылыш сыйныф укучыларын Бердәм дәүләт имтиханнарына әзерләү максатыннан оештырылачак күнектерү имтиханнары турында
Рособрнадзор чыгарылыш сыйныф укучыларын Бердәм дәүләт имтиханнарына (БДИ) әзерләү максатыннан оештырылачак күнектерү имтиханнарын үткәрү тәртибе турында аңлатма бирде.
Күнектерү имтиханнары үткәрүнең төп бурычы - чыгарылыш сыйныф укучыларын, җәмәгатьчелек күзәтүчеләрен, имтихан үткәрү пунктлары җитәкчеләрен һәм дәүләт имтихан комиссиясе вәкилләрен Бердәм дәүләт имтиханнары процедуралары белән таныштыру.
Күнектерү имтиханнары үткәрү турында түбәндәгеләр хәбәр ителә:
- Рәсәй Федерациясе законы буенча имтиханнарны оештыру һәм үткәрү өчен әти-әниләрдән акча җыю каралмаган;
- имтиханнарда укучыларга биреләчәк биремнәр (материаллар) урта (тулы) гомуми белем дәүләт федераль стандартларына туры килергә тиеш;
- уку елы дәвамында үткәрелә торган имтиханнар саны белем бирү процессына, 10-11 нче сыйныфларда үзләштерергә тиешле материалларның күләменә һәм сыйфатына начар яктан тәэсир итмәсен өчен әлеге имтиханнарны елына 1 тапкыр үткәрергә тәкъдим ителә.